Së paku 31 tonë furnizime mjekësore dhe ilaçe të dërguara nga Organizata Botërore e Shëndetësisë (OBSH) mbërritën në Jemen, njoftoi agjencia zyrtare e lajmeve e këtij vendi, transmeton Anadolu Agency (AA).

Ministria e Shëndetësisë njoftoi se ka pranuar 16 tonë ilaçe dhe furnizime mjekësore nga OBSH, sipas agjencisë së lajmeve SABA.

Ndërkohë, grupi Huthi tha se 15 tonë ilaçe dhe furnizime mjekësore nga OBSH i pranuan në Sana.

Komiteti i Jemenit për luftën kundër koronavirusit tha se numri i të vdekurve atje ka arritur në 65, me 283 raste.

Zëvendëssekretari i Ministrisë së Shëndetësisë së Jemenit Abdurrakib el-Haydari tha se 20 mjekë kanë vdekur nga virusi që nga 10 prilli.

Jemeni është përfshirë nga dhuna dhe kaosi që nga viti 2014, kur rebelët Huthi pushtuan pjesën më të madhe të vendit, përfshirë kryeqytetin Sana.

Kriza u përshkallëzua në vitin 2015 kur një koalicion ushtarak i udhëhequr nga Arabia Saudite filloi një fushatë shkatërruese ajrore që synonte të parandalojë shtrirjen territoriale të rebelëve.

Dhjetëra mijëra jemenas, përfshirë civilë, besohet të jenë vrarë në konflikt, i cili ka çuar në krizën më të keqe humanitare në botë, pasi miliona njerëz mbeten në rrezik të urisë.